Cynhaliodd Coleg Dewi Sant ddiwrnod ymwybyddiaeth diwylliant llwyddiannus iawn ar 16 Chwefror, gan arddangos diwylliannau a gwledydd amrywiol ei fyfyrwyr.
Mae gan Goleg Dewi Sant fyfyrwyr o fwy na hanner cant o wahanol ddiwylliannau a gwledydd, sy’n golygu ei fod yn un o’r Colegau mwyaf amrywiol yn y wlad. Ar 16 Chwefror, buom yn dathlu ein cefndiroedd, teuluoedd a gwahaniaethau ar ddiwrnod a wnaeth i ni deimlo’n fwy gyda’n gilydd fel cymuned nag erioed o’r blaen.
Cynrychiolwyd pob gwlad gyda stondin, gyda myfyrwyr yn gwisgo dillad traddodiadol ac yn arddangos baner eu gwlad yn falch. Roedd gweld myfyrwyr yn rhyngweithio, wedi’u gwisgo mewn saris, cimonos, sgarffiau pen, a ffrogiau o Iran, gyda steiliau gwallt diwylliannol a henna, yn llenwi’r brif neuadd ag awyrgylch o falchder ynom ein hunain a’r hyn sy’n ein gwneud ni pwy ydym ni.
Roedd y digwyddiad yn cynnwys amrywiaeth eang o fwydydd blasus o bob stondin, yn enwedig stondin Twrcaidd brysur a stondin Nigeria brysur iawn – yn cynnwys cymysgedd o bwdinau melys a seigiau reis a chrwst.
Roedd yr ystafell yn llawn egni pan ddechreuodd y gerddoriaeth, gyda myfyrwyr yn llunio rhestr chwarae o gerddoriaeth o Romania, Gwlad Pwyl, Pacistan, India, Moroco, yr Eidal, Mongolia a llawer mwy. Cryfhaodd yr egni pan ddechreuodd cerddoriaeth curiad Affricanaidd chwarae ac roedd myfyrwyr yn annog eraill i ddawnsio.
Yn ystod amser cinio prysur iawn, daeth y diwrnod i ben gyda gorymdaith ar draws campws y Coleg, dan arweiniad drwm Indiaidd. Dilynodd cannoedd o fyfyrwyr yn chwifio baneri a dathlu gyda’i gilydd.
Aeth llawer o fyfyrwyr at y cyfryngau cymdeithasol i ddathlu’r diwrnod, gyda fideos yn cael miloedd ar filoedd o weliadau a hoffiadau.
Dywedodd un myfyriwr, “Roedd yn rhyfeddol gweld cymaint o wahanol ddiwylliannau’n cael eu cynrychioli a pha mor falch oedd myfyrwyr, ac yn angerddol am rannu eu profiadau wrth dyfu i fyny.”
Dywedodd un arall, “Roedd hwn yn teimlo fel dathliad o bethau nad ydynt fel arfer yn cael eu dathlu. Gwnaeth hyn i bobl deimlo emosiynau cryfach a wnaeth i hyn deimlo cymaint yn fwy arbennig.”
Tra ychwanegodd myfyriwr arall, “Doeddwn i ddim yn disgwyl iddo fod mor fawr â hyn! Roedd yr egni a’r awyrgylch mor dda, ac roeddwn i wrth fy modd yn gweld pob diwylliant yn dod at ei gilydd”.
Dywedodd yr Aelod Seneddol lleol ac Ysgrifennydd Gwladol yr Wrthblaid dros Gymru, Jo Stevens, fu ar ymweliad i ddathlu’r gwahaniaethau rhwng myfyrwyr o fewn ei hetholaeth
“Roedd yn wych gwylio adloniant anhygoel a rhoi cynnig ar fwyd o 30 o’r diwylliannau gwahanol sy’n cael eu cynrychioli yng Ngholeg Dewi Sant.
Dathliad gwych o amrywiaeth Canol Caerdydd.”
Llongyfarchiadau i bawb a gymerodd ran yn trefnu’r diwrnod. Roedd yn ddiwrnod a fydd yn gofiadwy am flynyddoedd i ddod i’r holl fyfyrwyr ac aelodau staff a gymerodd ran.
