Cafodd Coleg Dewi Sant ddiwrnod rhagorol yn Nhwrnamaint Pêl-fasged Rhanbarthol y Colegau Cymreig ddydd Mawrth, gyda thri thîm yn cynrychioli’r coleg a’r tîm cyntaf yn ennill y teitl rhanbarthol.
Daeth y twrnamaint gwych i ben gyda buddugoliaeth gyffrous yn y gêm derfynol yn erbyn y gystadleuwyr lleol, CAVC – llwyddiant a amlygodd gryfder cynyddol ein Hacademi Bêl-fasged.
Gwnaeth ein tri thîm argraff dda trwy gydol y cyfnodau grŵp. Llwyddodd y tîm cyntaf i gyrraedd y rownd derfynol heb golli gêm, tra collodd yr ail dîm o drwch blewyn yn erbyn tîm cryf CAVC 1.
Dangosodd y trydydd tîm benderfyniad mawr hefyd, gan orffen eu hymgyrch grŵp gyda buddugoliaeth haeddiannol.
Roedd cael tri thîm cystadleuol i gynrychioli’r coleg am y tro cyntaf yn gamp wych, ac mae’n dangos cryfder aruthrol a dyfnder y talent sydd o fewn yr academi.
Yn y rownd derfynol, wynebodd y Seintiau eu cystadleuwyr lleol, CAVC, gan fod yn benderfynol o adael y trechiadau blaenorol ar eu hôl. Roedd y gêm yn un agos o’r dechrau i’r diwedd, gyda’r naill ochr a’r llall yn rhoi ychydig iawn o gyfleoedd i’r gwrthwynebwyr.
Wrth i’r fantais newid dwylo drwy gydol y gêm, daeth popeth i lawr i’r eiliadau olaf. Diolch i ymdrech amddiffynnol wych a thafliad tri phwynt pwysig gan y capten, Lassana Sumare, aeth Dewi Sant ar y blaen, 15–12.
Cafodd CAVC un cyfle olaf i ddod yn ôl i’r gêm, ond cadwodd y Seintiau eu hunanreolaeth i sicrhau buddugoliaeth wych.
Mae’r fuddugoliaeth yn golygu bod Dewi Sant yn cael eu coroni’n Bencampwyr Rhanbarthol Colegau Cymru, ac mae’n sicrhau ein lle ym Mhencampwriaethau Colegau Prydain yn y flwyddyn newydd, lle byddwn yn cynrychioli Cymru yn erbyn timau coleg cryfaf y DU.
Llongyfarchiadau mawr i’r holl chwaraewyr, ac i’r hyfforddwyr Seve a James, am eu gwaith caled a’u hymroddiad. Dylai’r tri thîm fod yn hynod falch o’u perfformiadau.
Camp wych i’r Academi Bêl-fasged a’r coleg cyfan. Dymunwn y gorau i’r tîm cyntaf yn y pencampwriaethau cenedlaethol!