Mae wedi bod yn fore i’w gofio i fyfyrwyr a staff Coleg Dewi Sant, wrth i’r aros hir am ganlyniadau ildio i ddathliadau ac ymdeimlad o gyflawniad.
Trodd y nerfau’n gyflym yn gyffro wrth i ganlyniadau Coleg Dewi Sant ragori ar gyfartaleddau cenedlaethol.
Mae mwy o fyfyrwyr nag erioed o’r blaen wedi cwblhau eu cyrsiau, gan amlygu gwydnwch a gwaith caled carfan sy’n haeddu dathlu pob cam o’u cyflawniadau.
Mae tri myfyriwr yn symud ymlaen i astudio Deintyddiaeth ym Mhrifysgol Caerdydd, ac mae tri myfyriwr wedi cadarnhau eu lleoedd yn Rhydychen.
Mae llwyddiannau mawr hefyd i fyfyrwyr sy’n rhan o’r Rhaglen Meddygaeth, Deintyddiaeth a Gwyddor Filfeddygaeth. Llwyddodd pob un o’r deg myfyriwr a oedd wedi derbyn cynnig i astudio Meddygaeth i sicrhau eu lleoedd, gan gynnwys lleoedd yng Nghaerdydd, Caerwysg, Bangor, Bryste, Birmingham a Brighton. Mae un myfyriwr hefyd yn mynd ymlaen i astudio Gwyddor Filfeddygaeth ac un arall yn mynd ymlaen i astudio Meddygaeth Filfeddygol a Llawfeddygaeth, sef dau gwrs hynod gystadleuol.
Byddwn yn cael darlun llawnach o lwyddiannau’r myfyrwyr mewn prifysgolion wrth i ragor o fyfyrwyr gadarnhau eu lleoedd. Ar hyn o bryd, mae mwy na 500 o fyfyrwyr wedi sicrhau lleoedd mewn prifysgolion.
Roedd 30% o’r graddau Lefel A yn A* neu A, sy’n uwch na’r cyfartaledd cenedlaethol.
Roedd 58% o’r graddau Lefel A yn A*–B, sef 3.1 pwynt canran yn uwch na’r cyfartaledd cenedlaethol.
Rhagorodd dysgwyr Coleg Dewi Sant yn y Fagloriaeth Sgiliau Uwch Cymru, gyda 11.4% o’r graddau yn A*, a’r holl feincnodau yn uwch na’r cyfartaleddau cenedlaethol.
Roedd 25% o’r graddau Lefel UG yn A, roedd 45.6% o’r graddau yn A–B, sef 3.1 pwynt canran yn uwch na’r cyfartaledd cenedlaethol, ac roedd 67.7% o’r graddau yn A–C, sef 4 pwynt canran yn uwch na’r cyfartaledd cenedlaethol.
Cafodd Rhaglen Anrhydeddau Coleg Dewi Sant, y rhaglen ar gyfer dysgwyr mwy galluog a dawnus, ganlyniadau arbennig o gryf. Roedd 24.1% o’r graddau Lefel A yn A*, tra bod 84% o’r graddau o fewn yr ystod A*–B.
Mae myfyrwyr BTEC hefyd wedi rhagori, gyda 57% o ddysgwyr diplomâu estynedig yn ennill graddau rhwng DDD* a DDD – cynnydd o 17.1 pwynt canran o gymharu â’r llynedd – tra bod 100% o’r dysgwyr wedi llwyddo i basio eu cymhwyster.
Rhagorodd Joyce Wangechi Sanga drwy gydol ei chyfnod yng Ngholeg Dewi Sant ac mae’n gadael gyda phedair gradd A* anhygoel. Bydd yn astudio Nyrsio ym Mhrifysgol Abertawe fis Medi eleni a disgrifiodd Goleg Dewi Sant fel “Coleg hynod gefnogol ac yn lle gwych i ddysgu.”
Enillodd Joe Hankey dair gradd A yn ystod ei gyfnod yma, gan ddisgrifio Coleg Dewi Sant fel “cam nesaf gwych a lle i ddod o hyd i’ch hun.” Bydd Joe yn astudio yng Ngholeg Brenhinol Cerdd a Drama Cymru fis Medi eleni.
Dathlodd Francesco Venditto dair gradd A ac A* gyda’i ffrindiau y bore yma ac mae bellach yn paratoi i ddechrau ysgol hedfan.
Roedd yn fore i’w gofio i’r ffrindiau Clara Good ac Erin Hart, gyda Clara yn mynd ymlaen i astudio Marchnata ym Mhrifysgol Abertawe ac Erin yn symud ymlaen i astudio Pensaernïaeth ym Mhrifysgol Caerdydd.
Llongyfarchiadau i Ben Morton, cyn-ddysgwr Corpus Christi, a enillodd bedair gradd A* ac sy’n mynd ymlaen i astudio Ffilm yn Durham, ac i Rosalyn Mortimer, a enillodd DDD*, ochr yn ochr â BAB ar Lefel A; dau fyfyriwr sydd wedi cydbwyso eu hastudiaethau wrth chwarae rhan hynod weithgar ym mywyd y Coleg.
“Mae yna eiliadau ym myd addysg sy’n teimlo mor gynnes, ac mae gweld pobl ifanc yn agor eu canlyniadau ac yn sylweddoli bod y dyfodol y maent wedi gweithio tuag ato bellach o fewn eu cyrraedd yn sicr yn un o’r eiliadau hynny – hyd yn oed os nad dyna’r cynllun yr oeddent wedi’i ddychmygu i ddechrau.
Rydym wedi gwylio’r bobl ifanc hyn yn magu hyder a dewrder, ac mae eu gweld bellach yn cymryd eu camau nesaf yn fraint fwyaf.
Mae’r canlyniadau hyn yn perthyn i’n myfyrwyr, ond maent yn adlewyrchu ymrwymiad ein hathrawon a’n staff. Mae eu harbenigedd a’u hamynedd wedi helpu’r bobl ifanc hyn i gyrraedd y foment hon.
Edrychwn ymlaen yn awr at y myfyrwyr nesaf sy’n cyrraedd ym mis Medi, a’r cyffro wrth i ddysgwyr newydd ddechrau eu pennod gyda ni.”
